عزيزى الحمار ... ايوة انت حمار ... استنى بس يا جدع ماتزوقش هقولك انت ليه حمار، ماهو ببساطة يا جناب الحصاوى الكبير لما تبقى شايف ان تعذيب المواطنين وسحلهم ايام مبارك إجرام ونفس التعذيب ايام مرسى دفاع عن الشرعية تبقى اكيد حمار، لما تبقى شايف العنف ضد داخلية مبارك ثورة والعنف ضد داخلية مرسى فوضى تبقى اكيد حمار، لما تبقى شايف المولوتوف ايام مبارك مقاومة والمولوتوف ايام مرسى تخريب تبقى اكيد حمار، لما تستلقى على قفاك م الضحك من نكتة على مبارك وتشوف اختها على مرسى قلة ادب تبقى اكيد حمار، لما تشوف تعديلات مبارك الدستورية ترقيع للدستور وتشوف اعلان مرسى الدستورى تطهير للقضاء تبقى اكيد حمار، لما تشوف صكوك جمال مبارك خيانة وبيع علنى لاصول البلد وصكوك مرسى نهضة اقتصادية عظيمة لمجرد انهم ضحكوا عليك وفهموك انها صكوك اسلامية تبقى اكيد حمار، لما تبقى شايف ان الخروج على مبارك ثورة والخروج على مرسى مؤامرة تبقى اكيد حمار، لما تبقى شايف احمد عز وجمال مبارك حرامية اما حسن مالك وخيرت الشاطر رجال اعمال وطنيين تبقى اكيد حمار، لما تبقى شايف ابتسامة محمد البلتاجى وحلمى الجزار البلاستيك سماحة وتشوف غضب الشباب وصريخهم وهما بيستنجدوا بيك صياعة وبلطجة تبقى اكيد حمار، لما تصدق اننا عُملا وخوانة وكفرة زى ما شيوخ امن الدولة بيصورلوك لمجرد اننا ضد سياسة مرسى اللى ماتفرقش حاجة عن سياسة مبارك بل انها أسوأ تأكد انك حمار، وبعدين انت مش واخد بالك يا جناب الحمار ان الكلام اللى مرسى بيصدرهولك عننا هو نفس الكلام اللى مبارك كان بيحشى بيه دماغك. بلاش دى، مالفتش نظرك ده اذا كان عندك شوية نظر يعنى ان كل اللى بيتقتلوا طلبة وصحفيين ودكاترة ومهندسين مش بلطجية زى ما بيحاولوا يصورولك ماخدتش بالك ان الراجل اللى اتسحل واتعرى قدام العالم راجل غلبان على باب الله زى ملاييين عايشين حواليك ولما الداخلية هددته ووعدته بوظيفة مقابل انه يغير اقواله خاف وغيرها، وما اعتقدش ان ربنا اللى مابتبطلش كلام عنه وانت ماتعرفش عنه غير الاوهام اللى زرعتها جواك ثقافة الاستبداد اللى انت متربى عليها هيسأل الراجل ده يوم الحساب ولا هيسأل ست البنات سؤالك الاستنطاعى الشهير انتو ايه اللى وداكم هناك؟!!!!
واوعى تزعل اذا كنت شايفك حمار او بقول عليك حمار بالعكس دى حاجة مفروض تفرحك لان حموريتك دى دليل على انك لسه طيب وحبى للحمار هو اللى خلانى امنحك هذه الصفة بس يارب ما كنش ظلمت الحمار، لانك لو مش حمار تبقى حاجة تانية خالص اكيد انت بتحب الحمار اكتر منها عارف تبقى ايه؟.... تبقى قوّاد .... ايوة قوّاد لانك فى الحالة دى تبقى شايف وعارف وفاهم اللى بيحصل وحاطط وشك الناحية التانية لانه جىّ على مزاجك او بيصادف عندك هوى شخصى مايعرفهوش غيرك.
وطبعاً ليك حق تسأل: وليه ما يكونوش هما صح ومعاهم حق فى كل اللى بيعملوه وبكده انا لا حمار ولا قوّاد انا صح وانت اللى حمار وستين حمار؟
هقولك معاك حق جايز اكون انا اللى حمار بس ده فى حالة واحدة بس وهى التسليم بصحة حججهم الفارغة اللى من نوعية الحرب خدعة وانهم فى دار حرب يجوز فيها الكدب والحنث باليمين وخيانة العهود وانه لا مبادئ فى السياسة وساعتها هرد بيك لاصل المشكلة وهى وجوب فصل الدين عن السياسة لانه لو مافيش مبادئ فى السياسة فالدين ليس الا مجموعة مبادئ.
على الله تكون فهمت حاجة يا.........قرر انت بقى.
تسلم ويارب الناس تعرف وتفهم بقي ايه اللى بيحصل وليه الناس بتموت
ردحذف